رسالة لأمّي من تحت الأنقاض / غادة المر

رسالة لأمّي من تحت الأنقاض
غادة المر
اللبنانيون الجدد

اليوم يا إمّي..عمبكتبلك من بعد ما صار التّفجير عالمرفأ ،كنت أنا ورفقاتي بالخدمة ،جينا نطفّي النّار ونخّلص الناس إلّي بين الردم علقاني ،بعرف الوضع ما كان منيح ، الليل والدّخان وصوات التفجير ، كانوا كتار وكنت أنا ورفقاتي قلال ، بس إنت يا أمّي علمتيني ما خاف وضحي ، بعرف إنّك كتير قلقاني عليّ وكتير حاولتي تتصلي فيّ ، وبعرف قدّيش خفتي وعصّبتي وصلّيتي..وشمعتك إلّي ضويتها قدّام العدرا ..دابت وكنت شايفها قدّام عيني.
اعذريني يا امّي ما فيّ رديّت ..وحياة عيونك ، يا ريت كان فيّ .
كنت حابب خفف وجعك وخوفك وطمّن قلبك عليّ .،وشو تمنيت ضمّك وشمّك وامسح دموعك الي كرجت عوجك التعبان .
يا امي شو تمنيت يروح هالعتم الي ما بعرف كيف تكدّس حواليّ وعميخنقني .
حاسس حالي خيفان وجيعان وبردان وعبالي ارجع عالبيت .
وشو كان عبالي يختفي هالكابوس وشوف الضّو وعيونك عمضحكوا ويطّلعوا فيّ .
كتير خايف يا اميّ هون وحدي عتم وريحة ،غبرة وسكوت وريحة موت حواليّ .
عمبصرخ واحكي الصدى بركي حدا من رفاقي بيفيق وبيردّ عليّ ، من خوفي صرّخت وامسكت صليبي بأيدّي وصليّت ، تهالحكومة تكفي بحث وتفتيش عنّي وعن ناس متلي حبسهن الإنفجار تحت الردم وتحت الأرض .
يأمي ما قدرت ما بكيت وسبيت لهالطبقة الحاكمة والسلطة الفاسدة اليّ ذلتني وسرقت أحلامي وقمعتني وحبستني مع ناس كتير بتفجير من إهمال وفساد وطمع وسرقت مستقبلي والحلم وتركتني موت تحت الأرض .
سامحيني يا اميّ كان بدي ردّ وأطرد الخوف من قلبك ومن عينيّ .
ما كفاهن هالحكّام ارهاب وقمع وكذب وتهويل ونحنا هون علقانين وهني كتار حواليّ بس ما بعرف ليه ساكتين بحكين وما بردّوا عليَ .
خلص حاسس عبالي نام ،بس خايف موت واتركك عمتبكي وتعيطيلي وما اقدر ردّ عليك .
يمكن صار وقت إني غمض عيوني وفلّ بس وعديني ما بقى تبكي وقوليلن ما عاد في لزوم يعذبوا قلبن ويفتشوا عليّ ، أنا صرت فوق ملاك بالسّما.
رحصليلك وصللي لالله يحمي بلادي ويخلّصها من هالسّلطة الفاسدة وحكّامها القاسين وياخدن كلن لأنو هني كانوا سبب هالتفجير ودمّروا بيروت و اقطعوا الهواء عن رفقاتي وعنيّ .
دمّروا بيروت ولبّسوها التياب السّود.
بس وعد يا اميّ رحخبّر الله بكلّ شي عملوا وردّهن عجهنّم ..
هيدا اذا قدروا خلّصوا من بين إيدّيّ .

https://www.facebook.com/newlebanese.org/posts/315803429848948